رباعيات صلاح جاهين

إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!

سنوات وفايته عليا فوج بعد فوج
واحدة خدتني ابن والتانية زوج
والتالتة أب خدتني .. والرابعة ايه
ايه يعمل اللي بيحدفه موج لموج

ووعجبي

يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي !!!!

نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي !!!!

كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر
عجبي !!!

من بين شقوق الشيش و شقشقت لك
مع شهقة العصافير و زقزقـــــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقــــــــتلك
عجبي !!!

مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبى !!

مرغم عليك يا صبح مغصوب يا ليل
لا دخلتها برجليا ولا كان لى ميل
شايلنى شيل دخلت أنا الحياة
وبكره ح أخرج منها شايلنى شيل
عجبى !!

وأنا فى الضلام .. من غير شعاع يهتكه
أقف مكانى بخوف ولا أتركه
ولما ييجى النور واشوف الدروب
أحتار زيادة .. أيهم أسلكه ؟
عجبى !!

نظرت فى الملكوت كتير وانشغلت
وبكل كلمة (ليه ؟) و(عشانيه) سألت
اسأل سؤال .. الرد يرجع سؤال
واخرج وحيرتى أشد مما دخلت
عجبى !!

خرج ابن آدم م العدم قلت : ياه
رجع ابن آدم للعدم قلت : ياه
تراب بيحيا .. وحى بيصير تراب
الأصل هو الموت والا الحياة ؟
عجبى !!

ضريح رخام فيه السعيد اندفن
وحفره فيها شريد من غير كفن
مريت عليهم .. قلت يا للعجب
لاتنين ريحتهم فيها نفس العفن
عجبى !!

ياما صادفت صحاب وما صحبتهمش
وكاسات خمور وشراب وما شربتهمش
أندم على الفرص اللى انا سبتهم
والا على الفرص اللى ما سبتهمش
عجبى !!

والكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فيه سؤالات من غير ردود
عجبى !!

غدر الزمان يا قلبى مالهوش أمان
وحاييجى يوم تحتاج لحبة إيمان
قلبى ارتجف وسألنى .. أأمن بإيه ؟
أأمن بإيه محتار بقالى زمن
عجبى !!

يا باب أيا مقفول .. إمتى الدخول
صبرت ياما واللى يصبر ينول
دقيت سنين .. والرد يرجع لى : مين ؟
لو كنت عارف مين أنا .. كنت أقول
عجبى !!

أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى !!

عجبتنى كلمة من كلام الورق
النور شرق من بين حروفها وبرق
حبيت أشيلها فى قلبى .. قالت حرام
ده انا كل قلب دخلت فيه اتحرق
عجبى !!

قالوا الشقيق بيمص دم الشقيق
والناس ما هياش ناس بحق وحقيق
قلبى رميته وجبت غيره حجر
داب الحجر .. ورجعت قلبى رقيق
عجبى !!

حبيت .. لكن حب من غير حنان
وصاحبت لكن صحبه ما لهاش أمان
رحت لحكيم واكتر لقيت بلوتى
إن اللى جوه القلب مش ع اللسان
عجبى !!

نوح راح لحاله والطوفان استمر
مركبنا تايهة لسه مش لاقية بر
آه م الطوفان وآهين يا بر الأمان
إزاى تبان الدنيا غرقانة شر
عجبى !!

أنا كل يوم أسمع .. فلان عذبوه
أسرح فى بغداد والجزاير واتوه
ما اعجبش م اللى يطيق بجسمه العذاب
واعجب من اللى يطيق يعذب أخوه
عجبى !!

يا قرص شمس ما لهش قبة سما
يا ورد من غير أرض شب ونما
يا أى معنى جميل سمعنا عليه
الخلق ليه عايشين حياه مؤلمة
عجبى !!

شاف الطبيب جرحى وصف له الأمل
وعطانى منه مقام يا دوب ما اندمل
مجروح جديد يا طبيب وجرحى لهيب
ودواك فرغ منى .. وإيه العمل ؟
عجبى !!

فى يوم صحيت شاعر براحة وصفا
الهم زال والحزن راح واختفى
خدنى العجب وسألت روحى سؤال
أنا مت ؟ .. والا وصلت للفلسفه ؟
عجبى !!